شهداء الثورة 146

هذا الولد جان يجي يومية يومية يمنا للمفرزة نبدل ضماداته وننطي دوه ونضربه ابر لان حرفياً ماكو شي بجسمه صاحي حروق جروح شظايا كدمات ايده اليمنه مكسورة ! كلما يختفي ويرجع يكلي اجيتك مرة لاخ وما متت ويضحك .. جنت اروح اصعد لاماكن بيها ضرب وارجع الكي كاعد بالمفرزة يكلي انت هم متموت مثلي ثنينا منموت ويضحك !

جان يكعد يمي حتى ميسولف بس يتشاقة ويضحك ويركص .. مرة جابولياه مختنك وفاقد الوعي من السنك من صحيته كعد ضحك بوجهي وضحكت بوجهه كتله مو كتلك منموت ؟ كال اي انطيني راسك ابوسه بسته وباس راسي كتله انزع خوذتك ابوسك ميقبل .. يلبس خوذة حمرة مال ماطور .. لهسه اتذكر

يكلي "وين ميصير ضرب اروح " جنت اكله دير بالك مصطفى لتخبل روحك يضحك ويروح

مرة من المرات كاعدين ناكل لفات الصبح اني وياه

اجتي عائلة مرتبة وهو كاعد يتريك بس ديهز براسه يركص ف صوروه وبقه مكمل وهو فرحان من راحو كلي العائلة لو من منطقة فايخة لو جايين من بره من شكلهم مرتبين "شكد جانت حسرة بكلبه لعد يعيش عيشة مال اوادم "

راحت ايام وغيرو المفرزة وتغير مكاني مرة لاخ وبعد مشفته اليوم اثناء مداتمشى شفت صورته مصطفى استشهد

بجيت عليه هوايه بس شالفايدة ؟! مصطفى راح وما عاش العيشه الي يريدها

مصطفى مات وكل جسمه مضروب مثل العراق ماكو شي بي زين !

مصطفى استشهد مظلوم مثل هوايه شباب ببلدي

مصطفى استشهد واني لا

بس بداخلي هواية ماتت اشياء

شكد شباب مثله راحو ومحد يذكرهم وراح ترجع الناس لوضعهم ولا معبرين ولا مقدرين هاي الارواح الطلعت وراحت لخاطرهم ..

الله يرحمك يا طيب يابو ضحكة الحلوة

والله يساعد كلبنا شيتحمل💔..

#منقول