كرم الشهيد صفاء السراي

منقولة من صفحة الشهيد صفاء السراي على الفيسبوك

من الاشياء اللي ما چان يعرفها أحد بحياة صفاء وإتضحت بعد استشهاده..

هي مساعدته لدور الأيتام والفقراء، رغم ما جانت حالته ميسورة بس جان يتقاسم تعب شغله وياهم خصوصاً انه عاش مثلهم، يتيم الاب من الطفولة ولاحقاً يتيم الام

وحدة من هالمبادرات، اللوحات اللي چان يرسمها صفاء ما اخذ منها دينار واحد، كل مبالغها جانت تتحول مباشرة لدور الأيتام

( صفاء جان يسلم لوحاته لدار ايتام واللي يريد يشتري ينطيه صفاء العنوان حتى يكفل يتيم بـ٢٥ الف بالشهر مقابل اللوحة، يعني ما يستلم شي بايده نهائي )

طبعاً اغلب هالتفاصيل اتضحت بعد وفاته..

.

ومرة كتب منشور بـ٢٠١٨ :

( الي يريد يسحب لوحاتي سكرين او يطبعهن على تيشيرت او كوابة او اي شي

يطي لشخص فقير ٥ الاف وحلال عليه كلهن )

.

وكتب منشور ثاني هم بـ٢٠١٨ :

( اصدقائي الاعزاء

تم التبرع بجميع اعمالي لدار الغد المشرق للايتام

الي يريد يقتني اي لوحة منهن

يكفل يتيم من الدار ب٢٥ الف بالشهر

بالمدة الي هو يريدها

مكان الدار بغداد / الشعب / مدخل شارع الصحة )

.

وهواي عاتبوه اصدقائه انه حرامات ما تبيع لوحاتك وتستفاد منها، جان يجاوبهم ( مو مال اتكسب من الفن )

.

صفاء عطائه للناس الفقيرة والمحتاجة ما چان على گد اللي يگدر عليه، لا چان يبالغ ويقدم كل اللي بجيبه

وتجي مرات بدون مبالغة الله شاهد، يشتغل من الصبح لليل وبنهاية الشهر ما يملك سعر باكيت الجگاير بسبب مساعداته.

اضافة لمواقفه ويه اصدقائه بس نتحفظ عن ذكر تفاصيل هالمسألة احتراماً للخصوصية

.

الهدف من ذكر هالكلام مو حتى نبيّن صفاء ملاك، لا صفاء بشر مثلنا بس شايل أنظف گلب بالعالم، واعماله كلها يعرفها رب العالمين وهذا سبب محبة الناس اله واعمال الخير اللي صارت على روحه فهو مو بحاجة انه الناس تعرف هالشي

.

وكلي ثقة لو صفاء عايش ما چان راح يقبل اي احد يشارك اعماله هاي ويحچي بيها، بس اتمنى يسامحني لان هدفي مو حتى الناس تمدحه وإنما حتى تقتدي بيه، تتعلّم، وتحب الخير لغيرها مثله..

وما اريد تبقى حقيقته مجهولة مثل ما عاش بالدنيا

.

صفاء ما يريدنا بس ننقهر عليه ونحزن، صفاء يريدنا نكمل مسيرته ونعوّض غيابه ويكون فعلاً حاضر بتصرفاتنا وتعاملنا.

.

وبعد كل هذا، يجي واحد منحط حشاكم ويفكر يسيء لصفاء! أتمنى هالنماذج تروح للدار المذكورة، وتتأكد صفاء شنو وتشوف صفاء بعين الايتام ويعرفون شگد هم صغار أمامه..

.

*اسلوب صفاء الحلو بالصورة الثانية وترحيبه بالناس هذا موضوع ثاني..

.

#ابن_ثنوة_مايموت